薛家燕今日（22/2）现身新城电台出席节目宣传活动。早前有“亚视一姐”之称的麦翠娴，受访时重提33年前与老公龚汝华卷入缩水舖事件，累薛家燕劲蚀200多万，并公开向对方致歉求原谅，更强调两公婆都是受害者。
薛家燕今日出席电台节目宣传活动。（叶志明摄）
家燕姐在接受《香港01》访问时表示：“其实当时我系啱啱离咗婚，环境唔系咁好，而当时佢就同我讲，佢朋友推出一啲单位，表明买完之后就会有人接手，一买一卖就好快就赚钱，仲介绍我同薰妮买。到我买咗之后，落咗订唔使成交。点知个几月之后，我就打畀佢，佢就话冇人买就冇办法啰，同埋话买呢啲嘢就唔会话包生仔。呢番说话系佢老公讲，唔系麦翠娴。我就同佢讲，我就系听你讲话可以赚钱我先听你讲话买，如果唔系我就要成交二百几万。”
薛家燕33年前向麦翠娴公龚汝华购入缩水铺闹不快。（叶志明摄）
家燕姐续说：“之后我就即刻筹钱扑水，问屋企人借钱，同埋勤力咁做嘢，因为每个月都要供款两万。不过好彩当时复出拍《真情》，庆幸角色受欢迎，就系咁我先至渡过咗难关。但系呢，冇人买唔紧要，到我装修晒，先发觉原来系缩水舖，100尺，原来得六成面积，加上又违规，变咗就冇人买。到最后一个舖位百几万，我系12万卖咗出去。阵时对我嚟讲系好难过，系好大打击，真系好惨。”
家燕姐直言当时环境艰难。（叶志明摄）
家燕姐续说：“其实件事都过去咗咁耐，都同麦翠娴讲算啦，而我都得到个教训，阵时我都系听佢讲。而家我都提提大家，买任何物业都要咨询律师，同埋听清楚先好落叠，（麦翠娴提过见过你打招呼时表现尴尬？）系尴尬，相信你会明白我当时所经历嘅痛苦。（放低咗？）都放低咗，人生总要有一啲经验嘅，都得到教训啦，我唔会摆喺心度，都过咗过关，见到面我都会同佢打招呼。”
家燕姐话已经过咗去。（叶志明摄）
